Mem bann militan, mem si zot inyoran, zot tou rekonet, avortman li enn maler.

La-mazorite dir non lor avortman, sof pou trwa koz : Lasante fam, insest ek vyol.

Enn fam deza ena enn lavi : So mari, so paran, so fami, ek kitfwa deza mama enn ou plizir zanfan.

Lavi enn fam ena plis valer ki enn fetis ouswa mem kan (li dan vant) bizen konsider li imin.

Insest wi, me pa ninport kan. Eski donn drwa avorte apre ki tifi-la inn rode, pa enn pli gran ankourazman pou re-komet insest ankor?

Insest li deza enn pese. Eski ou repar enn pese par enn lot pese ? Sof byensir si li enn vyol.

Fodre pa bouskil fam-la : Akoz finn vyol li bizen avorte? O-kontrer ofer li bann konsey, led sosyal ek fasilite.

Donn lavi ena pli valer ki pran lavi. Komye koupl pena zanfan. Ofer bann-la enn sans ek an-mem-tan prezerv zot kont bann move konsyans.

Donn enn letan refleksyon. Si lor onzyem-semenn, viktim-la so konsyans kler lor avortman, ki so swe realize.

Lor nou media, enn bann fam isterik pe fer propagand zot imoralite : "Fam fer seki zot anvi avek zot lekor".

Avek sa slogan-la, dime ou-a-tande : "Fam so lekor pou li, li kapav vann li si li anvi".

Zot, bann Mouvman Liberasyon Fam ek lezot sipaki ankor, al liber fam depi seki fer fam vinn plis enn prodwi konsomasyon.

An-verite, Zis bann zanimo ki ena liberte total pou fer seki zot oule avek zot lekor. Nou pa oule nou sosyete vinn enn lazing zanimo sovaz !

Eski zot inn ouver dernye edisyon magazinn pou bann fam ki pe kopiy lor bann sosyete pouri,

Ena foto enn zanfan abiye kouma enn hipi, pye-ni, zip, regar inosan, ek li pe kasyet so pwatrinn avek enn sak (parski li topless !).

Pou larzan paran expoz so zanfan ek magazinn pibliye enn foto ki insit pedofili, san ki enn-sel fam proteste – samem liberasyon fam ?!

Legaliz avortman san kondisyon vedir pervertiz nou sosyete : Ankouraz bann adilt ek fam marye inyor kontrasepsyon ek

ofer bann miner ki kontan karte, krwar ki zot tro "cool" e a-la-mod, enn sans pou fwir konsekans zot iresponsabilite.

Ou anvi swiv lexanp swadizan flanbo liberte ki apel Lamerik avek so 750,000 adolesant ki tom ansint sak-lane ?

Ouswa ou anvi swiv sa sime mins, ki al ver enn laport etrwat, gide par bann parol selest pou viv enn lavi pirifye ?

Pa akoz enn lalwa ansyen ki bizen kansel li. Sinon tou bann krwayan bizen deshir zot liv-sakre, ki ranpli avek bann lalwa ek invant enn nouvo.

Tahir Hussen Pirbhay

25 Avril 2009